Ein heldur óvanlig sjón var at síggja á Havnarvág í dag, tá ein bátur varð loraður av einum farmaskipi niður á sjógv.
Talan er um Samson, nýggja sleipibáturin hjá skipasmiðjuni MEST, ið kom á Havnina í dag við farmaskipinum Calypso.
Richard Martin Mortensen, Sølu- og Marknaðarleiðari í MEST, upplýsir fyri in.fo, at talan er um ein nógv størri sleipibát enn teir, ið frammanundan eru í Føroyum.
- Hann kann sleipa 40 tons, og er tað tríggjar ferðir so nógv togmegi enn nakar annar sleipibátur í Føroyum. Hann er eisini tvífalt so stórur og tvífalt so breiður enn nakar annar sleipibátur í landinum.
Nýggi báturin hjá MEST er bygdur á hollendsku skipasmiðjuni Damen, men hevur MEST keyp bátin brúktan úr Dubai.
Richard Martin Mortensen greiðir frá, at báturin er keyptur, tí eftirspurningurin eftir einum størri báti hevur verið stórur.
- Vit hava fingið nógvar fyrispurningar frá ferðamannaskipum, fraktskipum og frálandaskipum, ið hava havt tørv á einum størri sleipibáti. Tí er Samson keyptur.
Umframt at vera sleipi- og loðsbátur, so kann Samson eisini brúkast sum bjargingarbátur, og hevur hann m.a. tvær vatnkanónir umborð.
