Samfelag fyri øll tíðindaskriv frá Ráðnum fyri brekað
Ráðið fyri brekað hevur í hesum døgum tikið stig til eina fundarrøð við kommunufeløgini og avvarðandi landsstýrismenn við tí endamáli at fáa almennar myndugleikar at ganga á odda fyri at tryggja atkomuviðurskifti fyri allar borgarar í Føroyum.
Ráðið fyri brekað arbeiðir við málinum at broyta hugburðin hjá almennu myndugleikunum. Í flestu førum er trupulleikin manglandi tilrættarlegging. Um hugsað verður um atkomuviðurskiftini, tá ein verkætlan byrjar, kostar hetta ikki stórvegis meira. Tað er tí eingin umbering fyri, at fyrilit fyri atkomuviðurskifti ikki verða tikin, tá ið verkætlanir verða framdar.
Ráðið ynskir at vísa á, at tá ið tosað verður um fólk við avmarkaðum førleika, so er ikki talan um ein ávísan avmarkaðan samfelagsbólk. Veruleikin er tann, at vit øll kunnu verða fyri hendingum, ið gera at vit í einum tíðarskeiði ella restina av lívinum hava skerdan førleika. Trupul atkomuviðurskifti skerja eisini møguleikarnar tá eitt nú hjá foreldrum við barnavogni og hjá fólki, ið eru illa gongd.
Demokratiráðstevna í Keypmannahavn
Norðurlendska handikapp politiska ráðið NHR, hevur skipað fyri eini kanning undir heitinum: Demokrati for alla . Kanningin snýr seg um atkomuviðurskiftini í parlamentunum í Norðurlondum. Føroyar eru við í hesi kanning, og verða úrslitini løgd fram á ráðstevnu á Christiansborg tann 2. december 2005.
Íblástur uttanífrá
Fyri at kunna seg um, hvussu arbeitt verður í okkara grannalondum á hesum økinum, fer Ráðið at hava ein innanhýsis temadag miðskeiðis í desembur við Mogens Wiederfelt, sum er aðalskrivari hjá center for ligebehandling af handicappede í Danmark. Henda miðstøð er knýtt at danska Ráðnum fyri brekað.
Í Ráðnum fyri brekað sita Sólja í Ólavsstovu, formaður, Jan Simonsen, umboð fyri Almanna- og heilsumálaráðið, Barbara á Tjaldrafløtti, umboð fyri Løgmansskrivstovuna, Marjun S. Olsen, umboð fyri Føroya Kommunufelag, Steinbjørn Jakobsen, umboð fyri Kommunusamskipan Føroya, Uni Rasmussen, umboð fyri MBF og Leila Solmunde formaður í MBF.
Nærri upplýsingar fáast hjá formanninum Sólju í Ólavstovu, á telefon 21 88 86.
