Gunvá við Keldu
Ta stuttu tíð málið um bygnaðarbroytingar hevur verið viðgjørt, havi eg enn ikki hoyrt aðra grundgeving enn, »at so fáa vit minni trupulleikar, vit í dag hava við manglandi samskifti millum skúlarnar.« Fyri tað fyrsta hevur øll árini verið ávíst samstarv millum skúlarnar og fyri tað næsta er henda grundgeving bæði ósaklig og meiningsleys, tá hugsað verður um tær grundleggjandi og umfatandi broytingar býráðssamtyktin kann fáa fyri skúlarnar.
Í vikuni áðrenn býráðsfundin fingu vit niðurstøðuna bæði skúlastýrini og leiðslurnar á báðum skúlunum høvdu undirskrivað. Niðurstøðan var greið, at tey ynsktu at varðveita bygnaðin við tveimum skúlum, tó var ynskiligt við størri samarbeiði millum skúlarnar.
Býráðssamtyktin
Málið kom fyri á býráðsfundinum 6. februar, har ein meiriluti samtykti at gera beint ímóti ynskjunum hjá báðum skúlastýrunum og leiðslunum í skúlunum. Ynskið hjá hesum meiriluta var, at fara frá at vera 2 skúlar við avikavist 377 og 337 næmingum, til 2 skúlar við eini einstreingjaðari leiðslu, uttan tó at leggja skúlarnar saman.
Í londunum uttanum okkum og her á landi síggja vit vanliga ikki størri skúlaeindir enn um 400-500 næmingar. Havi eisini hoyrt fakfólk í Føroyum og londunum uttanum okkum sagt, ”gerið fyri alt í verðini ikki ov stórar eindir”.
Vit skulu eisini minnast til broyttu fortreytir okkara her í Klaksvík, har vit væntandi fara at vaksa og býurin fer at broytast annarsleiðis enn fyrr.
Á býráðsfundinum gjørdi eg vart við, at tað er eitt álvarsamt mál, tá eitt býráð velur at ganga ímóti ynskjum hjá báðum skúlastýrunum og leiðslunum á báðum skúlunum, tvs. tilmælum frá fakfólki. Eins og eg saknaði veruligar grundgevingar fyri hvørjar fyrimunir tað verður at fáa EINA leiðslu sum skal hava knapt 1000 børn og einar 60-65 lærarar at stjórna.
Einki svar fingið
Í samráðingum í býráðnum og við Mentamálráðið havi eg greitt frá míni støðu, sum formaður í Mentanarnevndini, at eg undir ongum umstøðum atkvøði fyri einari ætlan við so illa gjøgnumhugsaðum grundgevingum. Havi eisini spurt bæði Mentamálaráðið og býráðið hvat vit gera meðan arbeitt verður við eini møguligari bygnaðarbroyting, uttan at hava fingið nakað svar.
Støðan sum er íkomin nú har bæði næmingar, lærarar, foreldur og leiðsla føla seg stak ótrygg, kunnu vit sum hava ábyrgdina, ikki bjóða teimum.
Eg vil tí við hesum skrivi gera vart við mína støðu, at eg hvørki havi atkvøtt ella fari at atkvøða fyri hesum máli. At eg havi ávara ímóti teimum trupulleikum sum eru íkomnir, nú ein meiriliuti í býráðnum hevur tikið støðu til at broyta bygnaðin.
Fari eisini at gera vart við, at eg eri og havi allatíðina verið samd í niðurstøðuni skúlastýrini og leiðslurnar eru komnar til.
