Nýggjasti stuttfilmurin hjá Sakarisi Stórá, Vetrarmorgun, er boðin við á filmsstevnu í Berlin í døgunum frá 6. til 16. februar. - Sostatt verður fyrsta altjóða frumsýningin av filminum á eini tí mætastu filmsstevnuni í heiminum, Berlinaluni, sigur framleiðarin, Ingun í Skrivaragøtu. - Her skal Vetrarmorgun vera við í kapping um tvær ymiskar virðislønir, umframt at fyrireikarnir hava boðið leikstjóranum til Berlin at greiða frá filmsverkinum. Filmsstevnan í Berlin verður roknað millum týdningarmestu stevnurnar í heiminum, ájavnt við ta í Cannes. Í fjør vóru 124 lond umboðað á stevnuni, og meiri enn 300.000 atgongumerki seld. Vetrarmorgun er framhald av stuttfilminum, Summarnátt frá 2012, og tað er aftur Maria, sum er høvuðspersónur. Hon stendur á einum vegamóti. Alt er um at broytast. Einasta vinkona hennara er javngamla Birita.
Samstundis sum Maria ivast í sínum kynsliga samleika, er slatur farin at ganga um hana í bygdini. Filmurin er ein ungdómssøga, ið snýr seg um kærleika, vinarlag og samleika. Myndin er av teimum báðum høvuðspersónunum, sum Armgarð G. Mortensen og Helena H. Jørgensen, leika. | 
