Sjúrður P. Joensen - Sjúrður í Koltri, róptur - hevur lagt út á sína Facebook-síðu eina eygleiðing, eftir at teir hava verið niðri í Lonini í Sandoynni og kannað, hvussu lomvigin hevur tað.
- Lonin er eitt av teimum stóru bjørgunum vestan fyri á Sandoynni, har eitt stórt tal av fuglameingi heldur til, eitt nú lomvigi, álka, lundi og havhestur.
Hann vísir á, at fólk, sum fylgja gongdini við sjófuglinum og hava stóran áhuga í gomlu veiðimentanini, fegnast um, at talið av lomvigareggum og pisum er vaksið munandi seinastu 3-4 árini.
Sjúrður í Koltri sigur seg onga løtu ivast í, at tað eru broyttu náttúruviðurskifitini, sum eru orsøkin til betraðu gongdina við sjófuglinum, og neyvan nýtist fuglinum so langt til havs eftir føði.
- Vit vóna, at sjófuglurin fer at mennast so nógv, at tað aftur fer at bera til at ræna lomvigaregg, sum vit ikki hava rænt síðan 2010.
Sjúrður í Koltri vísir á, at tað er hugaligt aftur at síggja eitt nú nebbasild, brisling og hvítingsbróður á rókum og í eygum í berginum - føði, sum fuglurin missur úr nevinum.
- Tað er stuttligt at síggja lomvigan aftur við hesum góða mati í nevinum, sigur Sjúrður P. Joensen.
