Íslendingar eru ikki sørt argir um, at talvborðið, sum varð nýtt í legendariska ?triðja talvinum? um heimsmeistaraheitið í talvi í Reykjavík í 1972, er selt á uppboðssølu. Uppboðsølan var í New York og talvborðið varð selt fyri slaka hálva milliónir krónur.
Ein tjóðargripur.
Aldarinnar talvorrusta, í Reykjavík, var ímillum Boris Spassky, úr táverandi Sovjetsamveldinum og Robert James Fischer - Bobby Fischer - úr USA.
Orrustan var nakað heilt serligt.
Kalda kríggið var í hæddini. Sovjet var fullkomiliga einaráðandi á altjóða talvpallinum og hevði verið tað í áratíggir.
Heimsmiðlarnir vóru í Íslandi.
Tað serliga við júst hesum talvborðinum er, at eftir at Fischer hevði tapt fyrsta talvið í Laugardalshøllini, valdi hann ikki at møta upp dagin eftir. Var ikki nøgdur við umstøðurnar, ov nógvur larmur. Vildi als ikki telva meir. Nú var støðan 2-0 til Spassky.
Men eftir drúgvar diplomatiskar samráðingar, vórðu ynskini hjá Fischer gingin á møti.
Í ?legendariska, triðja talvinum? varð telvað í smærri hølum í Høllini. Fischer sigraði.
Mett verður, at júst hetta talvið varð avgerðandi, at Fischer gjørdist heimsmeistari.
Helmaði ikki í. Spassky legði kongin.
Fíggjarkreppan sigst vera orsøkin til, at táverandi forsetin í Íslendska Talvsambandinum, Gudmundur G. Thórarinsson, gjørdi av at selja søguliga, signeraða, talvborðið.
Talvborðið var ein gáva til forsetan fyri hansara megnartak at fáa HM í lag í Reykjavík.
Fischer andaðist í 2008, 64 ára gamalur og varð jarðaður í Laugardali, Selfoss, í Íslandi.
