Ukrainski forsetin, Volodymyr Zelensky, sigur, at hann fer at hitta amerikanska forsetan, Donald Trump, í sambandi við aðalfundin hjá ST í næstu viku.
Tað skrivar Reuters.
Sambært Zelensky fer hann at "hava fund við amerikanska forsetan" at umrøða trygdartrygd fyri Ukraina og revsitiltøk móti Russlandi.
Teir báðir forsetarnir hava hitst fleiri ferðir í ár.
Leiðararnir umrøddu kríggið í Ukraina á fundunum. Tað nú meira enn hálvt triðja ár síðani, at Russland herjaði á Ukraina í 2022.
Fyrr í vikuni segði amerikanski uttanríkisráðharrin, Marco Rubio, at Trump framvegis vónar at fáa eina friðaravtalu við Zelensky og russiska forsetan, Vladimir Putin.
- Hann fer at halda fram at royna. Um friður ber til, vil hann røkka tí, sigur Rubio.
- Einaferð kann forsetin koma til ta niðurstøðu, at tað ber ikki til. Hann er ikki har enn, men hann kundi komið til tað stigið.
Trump kom til valdið í USA við einum lyfti um at enda kríggið upp á ein dag.
Fyri einum mánaði síðani hitti Trump Putin á toppfundi í Alaska.
Tað var fyrstu ferð, at ein vesturlendsk tjóð loyvdi russiska forsetanum at vitja landið, síðani hann gav boð um innrásina í Ukraina í februar 2022.
Stutt eftir hitti Trump Zelensky og eina røð av øðrum evropeiskum leiðarum í Hvítu Húsunum.
Trump hevði frammanundan boðið Zelensky í Hvítu Húsini í februar.
Har gekk tað hart fyri seg millum Zelensky, Trump og amerikanska varaforsetan J.D.
Fleiri heimsleiðarar savnast nú í sambandi við fundin hjá ST í New York. Tað fer fram á hvørjum ári í september. Í ár er ST aðalfundurin fyri 80. ferð.
Her fara heimsleiðarar at halda røður í fleiri dagar.
Á hvørjum ári er eitt tema, og hesaferð er evnið: "Betri saman: 80 ár og afturat fyri friði, menning og mannarættindum".
/Ritzau/
