Amerikanska fregnartænastan kom fyrr í ár fram til, at russiska stjórnin ætlaði at myrða ovasta stjóran í Rheinmetall í Týsklandi, sum er ein av størstu vápnaverksmiðjunum í Evropa.
Tað upplýsir sjónvarpsstøðin CNN, sum vísir á amerikanskar og vesturlendskar keldur til upplýsingarnar.
Ætlanir vóru eisini frá russiskari síðu um at myrða aðrar ovastu stjórar í Evropa, sum stuðla Ukraina í verjustríðnum hjá landinum móti Russlandi, stendur í fráboðanini.
Tó verður ikki víst til ítøkilig prógv.
Sambært CNN ávaraði USA Týskland um ætlanir um at myrða stjóran hjá Rheinmetall, Armin Papperger. Týska fregnartænastan hevur síðani verið við til at verja hann.
Eitt høgt embætisfólk í Týsklandi váttar, at tað varð ávarað av USA.
Tað er ikki greitt av upplýsingunum frá keldunum, um Russland sjálvt var beinleiðis partur av ætlanini, ella um eitt morð á Papperger skuldi fremjast av einum avloysara.
Í longri tíð hevur illgruni verið um, at Russland, umvegis umboð, stendur aftanfyri fleiri sabotasjugerðir í Evropa. Millum annað við eldáseting.
Forsætisráðharrin í Póllandi, Donald Tusk, heldur sostatt, at eldur í Ikea í Litava kann vera eitt slíkt dømi.
Uttanríkisráðharrin í Týsklandi, Annalena Baerbock, hevur reagerað uppá nýggju upplýsingarnar.
- Í ljósinum av seinastu tíðindunum um Rheinmetall, er tað tað sama sum vit hava sagt meira og greiðari seinastu mánaðirnar, sigur hon sambært AFP.
- Russland førir eitt hybrid ágangskríggj. Við sabotasju, við net-álopum, við at lamma GPS soleiðis, at flogfør í Eystursjónum ikki longur kunnu lenda í grannalondunum.
- Vit hava sæð, at álop hava verið á fólk á evropeiskari jørð. Vit hava sæð, at tað hava verið álop á verksmiðjur. Og tað leggur enn einaferð dent á, at vit sum evropearar skulu verja okkum sum best og ikki vera naiv, sigur hon.
Rheinmetall framleiðir 155 mm granatir. Ukraina hevur harðliga brúk fyri teimum beint nú, um tað skal steðga russisku herdeildunum.
/ritzau/
