Mánadagin almannakunngjørdi altjóða felagsskapurin móti doping, WADA, eina gransking, sum vísti umfatandi og skipaða doping og mutur og oyðilegging av 1417 dopingroyndum í Russlandi.
Í gjárkvøldið hevði so altjóða sambandið fyri frælsan ítrótt, IAAF, aðalfund og avgjørdu, at útihýsa russiska limafelagnum.
- Boðskapurin kann ikki verða greiðari. Hetta hevur verið ein vekjari. Nú er tað upp til Russland at rudda upp. Hetta er harðasta revsingin, vit kunnu geva, sigur forsetin í IAAF, Sebastian Coe, sambært BBC.
22 limalond atkvøddu fyri, meðan eitt atkvøddi ímóti avgerðini at útihýsa Russlandi.
Avgerðin kemur í gildi beinanvegin og nú skal IAAF saman við WADA gera av, hvat Russland skal gera, fyri at sleppa upp í part aftur.
Hetta merkir, at møguliga vera eingir russiskir luttakarar í frælsum ítrótti í OL í Rio komandi ár.
