- Tað er stórur vandi fyri rakettálopum. Tí heiti eg á fólk um ikki at latast sum einki, tá ávaringarlúður ljóðar.
Tað sigur leiðarin fyri ukrainsku hernaðarumsitingina, Serhij Popko, sambært Reuters.
Borgarstjórin í næst størsta býi landsins, Kharkiv, sum kallast Oleh Syniehubov, váttar, at russar leypa á regiónina.
Sambært borgarstjóranum eru álopini vend móti undirstøðukervinum í landinum, streymi, hita og vatnveitingum.
Reuters veit at siga, at myndir og video eru at síggja á sosialu miðlunum av bygningum í Kharkiv sum brenna.
Tíðindastovan AP veit at siga, at eisini í Zaporizjzja-regiónini eru fleiri fráboðanir komnar um rakettálop.
- Eisini her eru álopini vend móti undirstøðukervinum í økinum, verður sagt.
Virkandi borgarstjórin í Zaporizjzja, Anatoly Kurtev, sigur, at 17 rakettir hava rakt býin í ein tíma, og hetta er størsta tal, síðan Russland leyp á hin 24. februar í fjør.
Hósnáttina byrjaði Russland stórálop har eysturi í Ukraina, og lopið hevur verið á fleiri staðni.
Ukrainskir myndugleikar hava sagt, at teir hava steðgað fleiri av álopunum á ymisku hermótunum, eitt nú í býunum, Bakhmut, Avdiivka og Marinka í Donetsk.
Tað eru fleiri serfrøðingar, sum ivast í, um russiski herurin fer at megna at venda krígnum í Ukraina til sigurs.
