Ein dómstólur í russiska býnum Chelyabinsk bannaði í dag danska framleidda dokumentarfilminum "Mr. Nobody Against Putin".
Tað siga russiskir miðlar sambært BBC og tíðindastovuni dpa.
Avgerðin hjá dómstólinum hevur við sær, at heimildarfilmurin skal takast úr trimum stroymingstænastum í Russlandi, skrivar BBC.
Dpa skrivar, at filmurin hevur verið tøkur á ymiskum netpallum í Russlandi.
Rættarúrskurðurin hevur við sær, at filmurin ikki má vísast ella býtast út.
Filmurin fylgir russiska læraranum Pavel "Pasha" Talankin, sum skjalprógvar, hvussu russiska skúlaskipanin broytist í takt við innrásina hjá Russlandi í Ukraina.
Upptøkurnar vórðu fingnar til heimildarfilmin í loyndum, og Talankin er síðani flýddur úr Russlandi.
Sambært ákærunum í málinum stuðlar filmurin eina neiliga áskoðan á russisku stjórnina og ósemjuna í Ukraina. Hetta boðar dpa frá.
Dokumentarfilmurin vann Oscarvirðisløn í bólkinum Besti Dokumentarfilmur fyri sløkum tveimum vikum síðani. Filmurin varð m.a. framleiddur av donsku Helle Faber.
Amerikanski leikstjórin í filminum, David Borenstein, hevur støð sína í Keypmannahavn.
Sambært BBC hevur ein statsligur mannarættindafelagsskapur í Russlandi eisini áður kritiserað, at filmurin vísir myndir av russiskum skúlanæmingum, uttan at filmsframleiðararnir hava fingið samtykki frá foreldrum teirra.
Sambært dpa kritiseraði rætturin eisini hetta í síni avgerð.
Rætturin hevur eisini mett, at filmurin inniheldur "propaganda fyri yvirgangi."
Sambært dpa hevur russiski Oscar-vinnarin Nikita Mikhalkov kritiserað filmin fyri at vera ein "skemmandi manifest av haturi móti russarum."
Dmitrij Peskov, sum er talsmaður fyri russiska forsetan, Vladimir Putin, varð spurdur um filmin eftir Oscar-virðislønina.
– Eg havi ikki sæð hendan filmin, svaraði hann sambært BBC.
Dpa skrivar, at "Hr. Nobody Against Putin" framvegis fæst uttan fyri Russland.
/Ritzau/
