Í Russlandi er Aleksej Navalnyj, sum hevur funnist at stýrinum hjá Putin, fingið fimm ára fongsulsdóm. Hetta skrivar Interfax sambært Aftenposten.
Dómin hevur hann fingið fyri at hava svikað fyri tríggjar milliónir krónur í skógarvinnuni í býnum Kirov.
Navalnyj heldur sjálvur, at málið móti honum er politiskt litað orsakað av, at hann hevur funnist at sitandi stjórnini hjá Putin.
Stórur áhugi hevur verið fyri rættarmálinum, og tað frættist, at 170 tíðindafólk hava kappast um tey fimmti plássini, sum vóru sett av til fjølmiðlarnar.
Fongsulsrevsingin er fimm ár, og harvið sleppur Navalnyj ikki útaftur fyrr enn eftir forsetavalið í 2018. Hann varð í hondjørnum førdur burtur úr rættarsalinum.
Fyrr í ár kom fram, at Aleksej Navalnyj er góðkendur sum borgarstjóravalevni í Moskva í september. Men tað verður kanka trupult, nú hann er dømdur at sita.
Navalnyj hevur boðað frá, at hann fer at kæra dómin.
Andstøðuleiðarar fyri rættin
Amnesty og Human Rights Watch stúra fyri, at forfylgingin av russiskum mótstøðufólkum verður herd.
Ein annar andstøðuleiðari, tann vinstravíðgongdi Sergej Udaltsov, situr í húsavarðhaldi. Punkrockararnir í Pussy Riot fingu fleiri ára fongsulsrevsing fyri ófrið.
(Mynd: Alexander Zemlianichenko)
