Rúni við mammu síni í býráðið

Ein sjáldsom hending fer fram, tá Tórshavnar býráð hevur fund í annaðkvøld. Tí fyri fyrstu ferð verða bæði móðir og sonur umboðað í fólkavalda býráðnum. Tað hendir, tá Rúni M. Djurhuus tekur sæti sum varalimur Javnaðarfloksins.

Mamma hansara, Bjørghild Djurhuus, umboðar frammanudnan Javnaðarflokkin í býráðnum. Hon varð vald á valinum í 2012. Eftir valið í 2008 var Rúni M. Djurhuus fyrsti varamaður floksins, og hann hevði sæti fleiri ferðir. Einaferð í eitt hálvt ár – og tilsamans heldur hann, at hann møti á umleið 10 býráðsfundum.

Á valinum í 2012 stillaðu bæði hann og mamman upp á sama lista, javnaðarlistanum. Mamman varð vald, meðan Rúni M. Djurhuus ikki varð valdur.

Fyrsta varamaður hjá Javnaðarflokkinum gjørdist Levi Mørk. Men nú hann er fluttur til Vágs og hevur skift kommunu, so kann hann ikki møta í Tórshavnar býráð. Tí verður tað Rúni M. Djurhuus, sum framyvir verður varamaður. Og tað er ikki hissini uppgáva, tí hann er varamaður hjá sjey av teimum trettan býráðslimunum, tí Javnaðarflokkurin hevur meirilutan einsamallur.

Halla Samuelsen, býráðslimur hevur forfall í morgin, og tí eru boð eftir Rúna M. Djurhuus. Talan verður kortini bara um tann eina fundin, tí hon hevur boðað frá, at hon verður burtur í 14 dagar. Um so er, at varalimur er inni í býráðnum í meira enn tríggjar mánaðir, so fær hann eisini sæti í føstu nevndum býráðsins. Varalimur, sum hevur sæti styttri enn tríggjar mánaðar fær bara sæti á býráðsfundum, sum eru eina ferð um mánaðin.

Atkvøðurnar hjá Javnaðarflokkinum fullu soleiðis til seinasta kommunuval. Tey fyrstu sjey á listanum, eru tey, ið vórðu vald: