Í morgin kemur kanadiarin, Chris Duff til Føroya við flogfari. Men tá ið hann fer úr aftur Føroyum, verður tað í einum lítlum árabáti.
Endamálið er at fullføra eina ætlan, hann legði fyri fleiri árum síðani og sum er at rógva í kjalarvørrinum hjá víkingunum úr Skotlandi til Íslands, og haðani víðari til Grønlands og Kanada.
Hann royndi í 2011, men tá mátti hann gevast rættiliga tíðliga, tí veðrið var ikki til vildar.
Hann royndi aftur í 2012 og tá eydnaðist honum at koma higar til Føroya, men veðrið varð ongantíð til vildar at halda leiðina fram til Íslands.
Men hann hevur ikki givið skarvin yvir og í summar roynir hann aftur, sigur hann á heimasíðu síni.
Hann er nú á veg úr Kanada til Íslands og í morgin kemur hann higar í teirri vón, at hann fær blíðari byr hesa ferð.
Hann sigur, at í Føroyum ætlar hann at styrkja bátin fyri at fyrireika seg, skuldi hann rent seg í ís undir Grønlandi.
Báturin, hann hevur, er 19 føtur og hann ber seg ómetaliga væl, sigur hann og so er bara at bíða eftir veðri.
Chris Duff er ógvuliga royndur rógvari. Í 1986 róði hann runt um alt stóra Bretland, Ongland, Skotland og Wales, í kajak.
Í 1996 róði hann runt um alt Írland. Í 2000 róði hann runt um Nýsæland og í 2003, róði hann runt um Ísland, saman við tveimum øðrum.
- Síðani hevur tað spøkt í høvdinum á mær, hvussu eg kundi samanbinda Stóra Bretland og Ísland, segði hann við Sosialin seinast hann var her.
Men er tað ongantíð, hann hevur hugsað, at nú er deyðin í durinum?
- Ájú. Tá ið eg róði runt Nýsæland, vóru aldurnar so stórar, at kajakkin brotnaði av um tvøran og tá stóð nógv á, segði Chris Duff í somu samrøðu við Sosialin
- Men eg vil kortini siga, at Røstin, suður úr Akrabergi, er ringasti sjógvur, eg havi róð í, legði hann afturat.
|
