Tann nýggja samgongan í Grønlandi fer at veita almennu fyritøkuni Royal Greenland 500 milliónir krónur í almennari hjálp. Tað váttaði komandi landsstýrisformaðurin Kuupik Kleist í gjár í samrøðu við danska kringvarpið.
Royal Greenland er í fíggjarligum trupulleikum, og fyritøkan hevur brúk fyri einari hálvari milliard krónum, skal hon ikki fara í gjaldssteðg, sigur DR. Tað samsvarar ikki við tað, sum stjórin í Royal Greenland, Flemming Knudsen, hevur sagt. Hann viðgekk í gjár, at fyritøkan hevur fíggjarligar trupulleikar, men segði, at eingin vandi var fyri gjaldssteðgi. Sambært stjóranum hevur Royal Greenland drigist við alt ov stóra skuld líka síðani byrjanina.
Grønlendska heimastýrið eigur allan partapeningin í Royal Greenland, og hetta er aðru ferð, at fyritøkan má fáa hjálp úr landskassanum. Fyru ferð var hjálpin 200 milliónir krónur.
Øll vistu tað
Fráfarandi landsstýrisformaðurin, Hans Enoksen, sigur, at tað eigur ikki at koma óvart á nakran í tí politiska umhvørvinum, at Royal Greenland var í álvarssomum fíggjarligum trupulleikum.
Hans Enoksen segði í gjár, at bæði landsstýrið og fíggjarnevndin hjá Landstinginum vórðu kunnað um støðuna longu í november í fjør.
Hans Enoksen skilir ikki, at Finn Karlsen úr Atassut skal seta fram spurningar um Royal Greenland nú, tí Finn Karlsen var sjálvur á fundinum hjá landsstýrinum, tá tað viðgjørdi støðuna í november, sigur hann.
