Nú siga fyrireikarar av vælumtókta danska Roskilde Festivalinum, at tey fegin vilja hava fólk at geva sítt boð uppá tónleikarar, sum ynski er um at hoyra næsta ár.
Tónleikasíðan Gaffa veit í dag at siga, at Roskilde Festivalurin nú letur dyrnar upp fyri, at fjepparar kunnu koma við boðum uppá hvør skal mynda tónlistarligu skránna í 2013.
Allan oktobur hava Facebook brúkarar møguleikan fyri at fara inn á síðuna hjá Roskilde Festivalinum og velja fimm danskarar ella fimm útlendingar, sum tey helst vilja hoyra í 2013.
Festivalurin er longu væl ávegis við at gera avtalur við tónleikarar til festivalin komandi ár, og úrslitið av Facebookboðunum hendan mánaðin kann fáa ávirka á valið.
Fyrireikarar siga við Gaffa, at festivalurin er til fyri fólkið, og tí skulu tey eisini hava møguleikan fyri at gera sína ávirkan galdandi.
