Føroyingaliðið í Reykjavík, Fram tók ikki av møguleikanum at vinna seg millum átta tey fremstu liðini í bestu íslendsku hondbóltsdeildini í kvøld.
Fram tapti greitt 25-32 fyri Vali á heimavølli. Í fyrra hálvleiki leikaði javnt á, og var Fram á odda 14-13 í steðginum. Valur var tó greitt tað betra liðið í seinna hálvleiki.
Rógvi Dal-Christiansen skoraði fimm mál og gjørdist toppskjútti hjá Fram í kvøld. Vilhelm Poulsen skoraði trý mál fyri Fram í kvøld.
Fram er nummar níggju í deildini við 12 stigum fyri 15 dystir. Afturelding er á áttanda plássinum, eisini við 12 stigum, men teir hava leikt tveir dystir færri enn Fram.
Átta tey fremstu liðini vinna seg í endaspælið tá grundspælið er liðugt.
Leygardagin tekur Fram móti botnliðnum, Víkingi sum bert hevur tryggjað sær tvey stig higartil.
