Fremsti írski málskjúttin nakrantíð, 38 ára gamli Robbie Keane gevst nú at spæla fótbólt.
Endastøðin hjá Robbie Keane gjørdist indiska liðið, ATK Kalkota har Robbie Keane skoraði seks mál í níggju dystum.
Sína bestu tíð hevði Robbie Keane í Tottenham, árini 2002-2008 og 2009-2011. Í 238 dystum fyri Tottenham skoraði Robbie Keane 91 mál. Robbie Keane gjørdi tað eisini gott í L. A. Galaxy, árini 2011-2016 har hann skoraði 83 mál í 125 dystum.
Tað eydnaðist Robbie Keane at vinna MLS Cup í USA tríggjar ferðir, og í 2008 vann hann liga-steypakappingina við Tottenham. Robbie Keane var partur av írska U18-landsliðnum sum vann EM í 1998.
Robbie Keane var framúrskarandi á írska A-landsliðnum. Í 146 landsdystum fyri Írland skoraði hann 68 mál.
Robbie Keane skoraði fýra ferðir ímóti Føroyum. Fyrru ferð 13. oktober í 2004 í HM-undankappingini, tá hann á Landsdowne Road leikvøllinum í Dublin skoraði til 2-0 í 2-0 sigrinum hjá Írlandi á Føroyum. Seinnu ferð á Aviva leikvøllinum í Dublin, 13. juni í 2013 í HM-undankappingini. Tá skoraði Robbie Keane hattrick í 3-0 sigrinum hjá Írlandi á Føroyum.
Robbie Keane skal nú verða hjálparvenjari hjá írska landsliðnum. Høvuðsvenjari er Mick McCarthy.
