Hóast kappingarárið hjá Manchester United skjótt fer í søgubøkurnar sum tað vánaligasta árið hjá felagnum í nýggjari tíð, er áhugin fyri stórfelagnum tó ikki minkaður.
Tveir av stóru risunum innan ítróttarklæði, Nike og Adidas, berjast í hesum døgum um at fáa eina stuðulsavtalu í lag við enska stórfelagið.
Avtalan, ið Manchester United hevur havt við Nike síðani 2002, gongur út á sumri 2015.
Og sum skilst er tað Adidas, ið er tættari við at fara við avtaluni hesuferð enn Nike.
Tað ljóðar at avtalan hjá Adidas við Manchester United kemur at geva enska stórfelagnum £60 milliónir pund um árið. Tað verður tó einki nevnt um, hvussu long avtalan kann vera.
Tað er tó ikki púra greitt enn, um tað verður Adidas ið fer avstað við avtaluni. Umframt Nike og Adidas eru eisini onnur ítróttarmerkir nevnd við í kappingini um stuðulsavtaluna. Millum annað kunnu nevnast Puma og Warrior, ið hevur avtalu við arvafíggindan hjá Manchester United, Liverpool.
