Kyndil spældi sín fyrsta dyst í hesum kappingarárinum í FTZ-deildini, tá ið KÍF kom á vitjan í høllini á Hálsi í kvøld. Talan var um dyst nummar tvey hjá KÍF í nýggja kappingarárinum, tí at í vikuskiftinum vunnu kollfirðingar tepran heimasigur ímóti StÍF - 26-25.
Og KÍF dugir tað við at vinna við einum máli, tí at kvøldsins dystur endaði 27-26 til KÍF.
Í fyrra hálvleiki var ikki nakar serligur munur á liðunum stóran part av hálvleikinum. At enda dróð Kyndil tó eitt sindur frá KÍF, og hetta merkti, at hálvleiksstøðan var 14-12.
Í fyrra partinum av seinna hálvleiki tyktist ongin ivi at vera um, at tað fór at blíva til tryggan heimasigur. Tá ið 40 minuttir vóru farnir var støðan 20-15 til Kyndil.
Men síðstu 20 minuttirnar komu kollfirðingar sterkt aftur, og endaliga úrslitið gjørdist 27-26 til KÍF.
Harvið hevur KÍF fýra stig eftir tveir dystir, meðan Kyndil framvegis er stigaleyst eftir sín fyrst spælda dyst.
