Tó allir flokkar ivast í fylgjunum av at loysa frá Danmark. Tí bæði Tjóðveldisflokkurin og Fólkaflokkurin siga, at Danmark skal gjalda til Føroyar nógv ár aftaná, at vit hava tikið loysingina. Teir vilja tí stovna føroyskt tjóðveldi við donskum studningi.
Hetta halda vit í Javnaðarflokkinum vera bæði óverdugt, órealistiskt og sera mannminkandi. Millum annað tí sigur Javnaðarflokkurin nei til loysing, men ja til størri sjálvstýri og størri sjálvsábyrgd.
Javnaðarflokkurin vil hava broytingar í viðurskiftunum við Danmark, tí heimastýrislógin er fimti ára gomul, og er ikki tíðarhóskandi nú.
Javnaðarflokkurin vil ikki hava loysing, tí tað merkir ein stóran niðurskur í livifótinum í Føroyum, tí vit missa við loysingini okkara rættindi sambært ríkisfelagsskapin.
Javnaðarflokkurin ynskir tí at varðveita ríkisfelagsskapin, men vil hava eina nýggja lóg, sum karm um ella grundarlag undir hesum felagsskapi. Javnaðarflokkurin nevnir uppskotið til hesa lóg fyri: sjálvstýrislóg.
Henda lóg skal vera ein semja millum fleiri flokkar á løgtingi, helst allar, men tað er kanska órealistiskt. Taka vit teir flokkar frá, sum onga broyting ynskja ella sum ynskja so kompromileysa broyting sum loysing, so er miðjan eftir í tjóðskaparpolitikkinum, sum eigur at semjast um innihaldið í eini nýggjari lóg. Kalla hana sjálvstýrislóg ella okkurt annað.
Javnaðarflokkurin hevur lagt uppskot fram á løgtingi um eina stjórnmálanevnd, sum skal fyrireika innihaldið í komandi lógini, sum skal avgera viðurskiftini millum Føroyar og Danmark.
Ein sjálvstýrislóg eigur at bera á størri stjálvstýri, sum navnið sigur, men lógin skal annars varðveita ríkisfelagsskapin og okkara rættindi sambært henda felagsskap.
Hetta er sera umráðandi lóggáva fyri vælferð okkara, fyri framtíð Føroya. Javnaðarflokkurin fer ikki at spæla við vælferð føroyinga, vit sera fólksins lívsvirði fram um tjóðskaparherrópini.
Men avgerðin er veljarans. Føroya fólk, hugsið tykkum væl um, tí valini í 1998 kunnu blíva okkum føroyingum sonn lagnuval. Atkvøðið tí fyri einum flokki, sum tit kunnu líta á, veljið Javnaðarflokkin.
Birgir Mohr
