Hetta var eftir at Øssur Winthereig, tíðindamaður, á fólkafundi og í persónligum tíðindaskrivi boðaði frá, at hann fór at stilla upp fyri Tjóðveldi. Aðrir flokkar høvdu frammanundan boðað frá, at hetta og hatta tíðindafólkið var á teirra lista. Men Øssur Winthereig gjørdi hetta sjálvur.
Fimm tíðindafólk stillaðu upp hesaferð – umframt tey, sum longu frammanundan vóru í politisku skipani. Tey nýggju vóru Øssur Winthereig og Ingolf S. Olsen fyri Tjóðveldi, Jústinus L. Eidesgaard fyri Sambandsflokkin, Tróndur Djurhuus fyri Framsókn og Rigmor Dam fyri Javnaðarflokkin.
Sum tann einasta rakk Rigmor Dam inn um tinggátt. Hon var vald sum nummar fýra á Javnaðarlistanum við 270 atkvøðum. Tróndur Djurhuus var eisini nummar fýra á sínum lista, men tað var ikki nóg mikið til ein tingsess. Hann fekk 169 atkvøður. Ingolf S. Olsen var nummar 12 á Tjóðveldislistanum við 146 atkvøðum. Jústinus L. Eidesgaard var nummar 16 á Sambandslistanum við 90 atkvøðum, og Øssur Winthereig var nummar 20 á Tjóðveldislistanum við 75 atkvøðum.
So hóast Høgni, John, Bjørt og kanska Sjúrður brúktu sjónvarpið sum lopfjøl, so riggar tað ikki altíð.
