Nógv virksemi er á bryggjuni í Vági og bryggjan er næstan ikki at kenna aftur, um vit hugsa nøkur ár aftureftir.
Gamla flakavirkið er enn ikki opið, men fleiri onnur hava stungið seg upp og fleiri av hesum smærru sigast nú hava ætlanir um at byggja út.
Heygadrangur
Vanligur gestur við bryggjuna í Vági hevur verið gamli Heygadrangur, ið nú er á útlendskum hondum og kallast Orcades Viking III. Hesin hevur landað, ella umskipað, í Vági og hetta hevur givið arbeiði til nógvar hendur.
Hetta skip, hvørs navn ikki fær góð minnir fram hjá øllum, kann sigast at hava komið væl við hjá vágbingum.
Frystigoymslan á gamla virkinum hevur verið nýtt, men nú hava útlendsku eigararnir, saman við føroyska felagnum, ið teir samstarva við, latið byggja nýtt og stórt frystihús á bryggjuni í Vagi.
Merkið og Union Jack
Reisigildi var mikudagin og á tekjuni sóust føroyska Merkið og Union Jack veitra. Hetta sjálvsagt orsakað av eigaraviðurskiftunum.
Arbeiðið at byggja frystihúsið hevur gingið skjótt og væl og stóra goymslan, saman við øllum virkseminum á bryggjuni annars, boðar óivað frá einum glotta fyri framman hjá vágbingum.
