Bæði Barcelona og Real Madrid vunnu í kvøld í sponsku landskappingini. Tað var grannauppgerð í Madrid í kvøld. Atletico Madrid tók á Vicente Calderon ímóti stórabeiggja, Real Madrid. Tað eru eftir hondini fleiri ár síðani, at Atletico Madrid hevur vunnið á Real Madrid og tað gjørdu teir heldur ikki í kvøld. Karim Benzema legði Real Madrid á odda longu eftir 11 minuttir við frekum máli. Tá hálvur tími var leiktur økti Mesut Ozil.
Atletico Madrid hevði onkrar møguleikar, men Iker Casillas í Real Madrid málinum stóð væl. Ikki fyrr enn fýra minuttir fyri tíð eydnaðist tað Sergio Augero, at minka um munin.
Barcelona fekk fyrr í kvøld vitjan av Getafe á Nou Camp. Oddaliðið í Spania hevði tamarhald á dystinum í 88 minuttir. Fyrst legði Dani Alves Barcelona á odda. Stutt inn í seinna hálvleiki økti Bojan til 2-0. Barcelona vildi eisini hava brotsspark í einum tveimum støðum, umframt at teir høvdu møguleikar at økja.
Tveir minuttir fyri tíð broyttist alt bráddliga. Manu minkaði um munin eftir innlegg og so trýsti Getafe fyri at fáa eitt stig. Og tað var eisini líka við, men Barcelona slapp við skrekkinum.
Barcelona er framvegis fimm stig frammanfyri Real Madrid í oddinum
