AB
Rani D. Christiansen skal í kappingarárinum, sum stendur fyri framman, spæla við AB. Tað skrivar AB heimasíðan, ab.fo.
Rani D. Christiansen varð í fleiri ár roknaður sum ein tann evnaríkasti av nógvu ungu spælarunum í HB. Álvarsligur skaði bar við sær, at tað í eitt langt skifti ikki bar Rana til at spæla. Í 2004 var hann í AB.
Í fjør royndi Rani seg aftur í HB, har hann var við í fýra landskappingardystum og fyri tað mesta var verjuspælari. Tríggjar ferðir varð hann skiftur inn, og eina ferð varð hann skiftur út.
Millum liðfelagarnar hjá Rana D. Christiansen í fjør var Rúni Nolsøe, sum nú verður spælandi venjari hjá Rana og hinum í AB.
Bjartur Nolsøe er nýggjur hjálparvenjari á Argjum. Hann og Rúni Nolsøe eru brøður, og teir spældu saman í barndómsfelagnum í Vági i fleiri ár. Bjartur spældi á besta VB liðnum frá 1989 og fram til 1994. Í 1995 var hann partur av 1. liðs hópinum hjá HB. Bjartur hevur venjaraútbúgving. Hann hevur verið ungdómsvenjari í HB í tvey ár.
Í AB ætla teir sær at gera enn eina roynd fyri fyrstu ferð nakrantíð at vinna kappingina um at flyta upp í bestu deildina. Besta mannfólkaliðið hjá Argja Bóltfelag hevur ongantíð enn verið í bestu deildini.
