Rættilig íslendsk innrás var í Havn í gjár, tá uttanríkisráðaharri Íslands, Valgerður Sverrisdóttir, beyð til stóra samkomu - fyrst í Norðurlandahúsinum og síðani í Fútastovu í Gongini, har íslendska aðalkonsuláti hevur til húsa.
Innbodnu gestirnir fingu okkurt gott undir tonna aftur við íslenskum tónleiki. Síðani beyð Valgerður Sverrisdóttir, uttanríkisráðharri, fólkunum inn í Klingruna, har hátíðarhaldið kom fram.
Í røðu síni vísti hon á nátúrliga sambandið landanna millum, og nevndi ymsar føroyingar, sum hava gjøt seg galdandi í Íslandi, teirra millum Jákup á Dul Jacobsen, Eivør Pálsdóttir og Jógvan Hansen, sum seinastu vikurnar hevur gjørt seg galdandi í X-Factor - og sum fríggjakvøldið vann seg í finaluna í hesi so væl umtóktu sjónvarpssangkapping í Støð 2 í Íslandi.
Hon takkaði eisini íslendska konslinum seinastu 22 árini, Poul Mohr, og hon handaði honum boksl við meil (Poul er íðin reiðmaður) við navni innskrivað í reimina.
Poul Mohr tók eisini orðið - takkaði fyri tíðina, og hann kundi ikki halda sær at koma við eini politiskari útmelding:
- Tá vaktarskifti er á skipi, var vanligt, at skiparin sigur kósina hart, og at tann, ið skal loysa av, endurtekur kósina, so eingin misskiljing skal vera. Mín kós er púra greið - tað er beint fram móti einum frælsum Føroyum, segði hann.
Hvussu Eiður Guðnason tók hetta, meldar søgan einki um - men ein so royndur maður í diplomatinum man neyvan koma við politiskum útmeldinum um sambandi Føroya og Danmarkar millum.
Eiður Guðnason kemur úr starvi sum sendiharri Íslands í Kina. Hetta er sum vera man ein stór broyting, men hvussu hetta fór at verða, visti Eiður Guðnason ikki - men hann helt fyri, at hann kom úr tí størsta landinum til tað besta landið!
Jóannes Eidesgaard helt eisini røðu á samkomuni, sum vit prenta niðanfyri.
Eftir hátíðarhaldið í Norðurlandahúsinum koyrdu bussar oman á Kongabrúnna. Síðani savnaðist samkoman niðan fyri Fútastovu, har innsiglið á aðalkonsulátinum varð avdúkað av uttanríkisráðharranum.
Síðani varð boðið til kaffi, te, kleynur og pannukøkur í Fútastovu, sum framyvir verður karmur um diplomatiska sambandið millum Føroyar og Danmark
