Rás2 fer framhaldandi at spæla tónleik frá klokkan sjey á morgni. Klokkan 9 verður mikrofonin í studio tendrað, og tá fer vertur at byrja Rás2 dagin. Ynskiløtan, sum øll árini hevur verið send seinnapartin, verður nú flutt til fyrrapart, og millum klokkan 10 og 12 kunnu lurtararnir senda heilsanir og ynski til Rás2. Eisini verður gjørligt at ringja inn við ynskjum og heilsanum hvønn fríggjadag.
Rás2 fer frameftir at leggja nógv fyri seinnapartar, og millum klokkan 13 og 17 fer Rás2 seinnapartur at bjóða aktuellar samrøður, viðkomandi innsløg, gott kjak, stórar kappingar, blandaðan tónleik og mangt annað.
– Rás2 skal verða eitt alternativ til hinar útvarpsrásirnar, og við okkara nýggja konsepti styrkja vit profilin sum tann livandi rásin, sum hevur tætt samband við lurtararnar, sigur Jonhard Hammer, stjóri á Rás2.
Vertir í nýggju sendiflatuni hjá Rás2 verða Rannvá Gaard Fossaberg, Mirjam Pætursdóttir, Jens Tummas Næss, Heri Simonsen, Evi Tausen, Tróndur Arge, Ragnhild Ellingsgaard og onnur.
Tíðindi verða framhaldandi send kl. 11, 12, 15, 16 og 17.
Rás2 hevur seinastu seks árini verið partur av Miðlahúsinum og er ein av trimum privat riknum útvarpsstøðum í landinum. Rás2 hoyrist um tað mesta av landinum og sendir hvønn dag millum klokkan sjey á morgni og midnátt.
