Tá kommunalu fíggjarætlanirnar vórðu lagdar fyri verandi ár – 2020 – samdust tær tríggjar kommunurnar í eldrasamtakinum Roðin um, at seta pening av til umbyggingar á Eysturoyar Røktar- og Ellisheimi í Runavík.
Tá bleiv mett, at samlaði kostnaðurin fór at vera á leið 13,7 mió. kr., og samdust partarnir um at klúgva útreiðsluna yvir tvey fíggjarár – 2020/21.
Endamálið við umbyggingini er millum annað at rationalisera køkshøpið, har farið verður frá tveimum til ein køk, sum er høgliga staðsettur í húsinum, at flyta funktiónir frá kjallaranum í Heilsudeplinum í Runavík niðan á Ellisheimi, og at fáa tikið svimjihylin á heiminum í brúk aftur, eftir at hann hevur staðið tómur í meira enn 10 ár.
Tað er Teknistovan Gøta sum hevur teknað og fyrireikað útbjóðingina. Tøkniligur ráðgevi hjá Roðanum hevur verið felagið RÁÐ – ráðgevandi verkfrøðingar.
Fleiri partar hava eisini skrivað undir sáttmálar við Roðan um umvælingina. Zacharias Leitisstein skal gera HVS arbeiðið, Maskinhandilin í Saltangará stendur fyri el-arbeiðinum, Búsetur stendur fyri timburarbeiðinum, og Leif Mohr stendur fyri køkinum.
Ætlandi byrjar arbeiðið alt fyri eitt og samsvarandi tíðarætlanini verður tað liðugt seint næsta summar.
