Landsliðsvenjarin í fótbólti, Brian Kerr, hevur sent 22 spælarum boð til teir báðar síðstu dystirnar í hesi HM-undankappingini, sum eru á útivølli ? fyrst ímóti Fraklandi 10. oktober og síðani Rumenia 14. oktober.
Toppskjúttin á føroyska landsliðnum, Rógvi Jacobsen, er aftur við, eftir at hann hevur verið skaddur tað nógva av hesum árinum, men síðstu dystirnar hevur spælt meira og víst sítt kenda máltev.
Andy Olsen, sum enn eigur fyrsta landsdystin til góðar, men hevur fyrr verið til venjingar hjá landsliðnum, er nýggjur maður í hópinum. Og so eru Vagnur Mohr Mortensen og Christian Høgni Jacobsen aftur við á landsliðnum.
Fróði Benjaminsen, Bogi Løkin og Atli Danielsen, ið høvdu karantenu, tá Føroyar herfyri á Svangaskarði vunnu 2-1 á Litava, eru eisini aftur við. Hinvegin hava Christian Lamhauge Holst, Jákup á Borg, Einar T. Hansen og Símun Samuelsen karantenu fyrra dystin ímóti Fraklandi, men kunnu spæla við ímóti Rumenia.
Teir 22 úttiknu:
Fróði Benjaminsen, HB
Jákup á Borg, B36
Egil á Bø, EB/Streymur
Atli Danielsen, KÍ
Jóhan Troest Davidsen, NSÍ
Bartal Eliasen, ÍF
Atli Gregersen, Víkingur
Arnbjørn Hansen, EB/Streymur
Einar Tróndargjógv Hansen, NSÍ
Christian Lamhauge Holst, Silkeborg
Christian Høgni Jacobsen, NSÍ
Rógvi Jacobsen, ÍF
Bogi Løkin, NSÍ
Jákup Mikkelsen, KÍ
Vagnur Mohr Mortensen, HB
Gunnar Nielsen, Manchester City
Jónas Þór Næs, Hvidovre
Andreas Lava Olsen, Víkingur
Andy Olsen, ÍF
Súni Olsen, Víkingur
Jann Ingi Petersen, NSÍ
Símun Samulsen, Keflavík
