Russiski forsetin, Vladimir Putin, biður um umbering fyri, at flogvanlukkan hjá Azerbadjan Airlines hendi í russiskum loftrúmi.
Tað upplýsir statsrussiska tíðindastovan Tass.
Sambært miðlinum skuldi umberingin hava verið í telefonsamrøðu millum Putin og aserbadjanska forsetan, Ilham Aliyev, sum russiski forsetin hevði tikið stig til.
Putin kallaði eisini flogvanlukkuna fyri eina ”syrgiliga hending”, sambært Reuters.
Í einum tíðindaskrivi í dag legði stjórnin í Kreml dent á, at flogfarið hevði roynt at lent í býnum Grozny í eini tíð, tá býurin var undir ukrainskum dronuálopum.
- Russisku loftverjuskipanirnar svaraðu hesum álopum aftur, sigur Kreml í eini fráboðan.
Fleiri fjølmiðlar hava seinastu dagarnar skrivað, at tað var russiskur loftverjurakettir, sum rakti flogfarið.
Fríggjadagin kom USA eisini við í málið.
Her upplýsti talsmaðurin í Hvítu Húsunum, John Kirby, sambært AFP, at Washington hevur "ábendingar" um, at Russland kann hava havt ábyrgdina av flogvanlukkuni.
Talsmaðurin fór ikki nærri inn á, hvat illgrunin byggir á.
Í kjalarvørrinum av flogvanlukkuni hava fleiri flogfeløg avlýst flúgvingina til Russlands.
Hetta veit AFP at siga.
/Ritzau/
