Danska uppboðssøluhúsið Bruun Ramussen hevur í dag sett 12 málningar hjá Sámal Joensen-Mikines til sølu. Frammanundan stóð ein annar málningur eisini til sølu, so nú eru samanlagt 13 málningar tøkir at keypa á uppboðssølu.
Tað er púra óvanligt, at so nógvir Mikines-málningar verða settir til sølu í einum.
Bruun Ramussen hevur gjørt metingar av teimum ymisku verkunum, og metingin fer upp um eina millión krónur.
Verkini hava ymisk motiv og eru málað í ymiskum tíðarskeiðum. Fleri av málningunum hava verið brúktir í framsýningum, bókum og í umrøðu av virkinum hjá Mikines.
Í fjør fekk Listasavn Føroya 17 málningar eftir Mikines sum gávu frá savnara í Danmark. Tað var Birte Schultz-Lorentzen, sum var gift við føroyska Jóannesi Torkil Mortensen, ið lat Listasavninum gávuna. Tey høvdu savnað list alt lívið.
Nú skal so eitt annað savn av Mikines seljast á uppboðssølu. Tann eini málningurin verður seldur 27. februar, og hinir 12, sum júst eru settir til sølu, verða seldir 5. mars.
##med2##
