-Eg havi fingið eitt pass frá danska uttanríkisráðnum, undirskrivað av táverandi uttanríkisráðharra, Niels Helveg Petersen, og har stendur "Prime Minister of The Faroe Islands", og tað er tað heitið, sum er brúkt undir allari hesari vitjanini.
Sjálvur sær løgmaður einki løgið í tí at verða kallaður Prime Minister undir slíkari vitjan. At hetta er sett í pass sítt metir hann sum eina viðurkenning av, at man í Danmark metir løgmann í Føroyum meira enn ein leiðara fyri eitt heimastýri. Og tað er bara gott heldur Anfinn Kallsberg, sum eisini vísir til orðatakið, at navnið spillir ongan. -Tað er nú heldur ikki júst heitið eg gangi nógv uppí, men meira hetta at fáa nakað burtur úr. Men heitið er so fult í tráð við tann status danskir myndugleikar hava sett um løgmann í Føroyum.
