Tað segði Bjarni Kárason Petersen, landsstýrismaður sum varðar av Posta, við Sosialin 17. januar í ár í sambandi við, at Posta hevði vunnið útboð um at koyra mat út til pensjónistar og millum røktarheim í Havn - í kapping við privata felagið Sp/F Petra.
Í dag sigur nýggi stjórin á Posta, Edvard Remberg, at Posta fer í kapping í ávísan mun við tað privata.
Landsstýrismaðurin segði við Sosialin 17. januar, at tað hevur verið ymiskt, sum Posta hevur tikist við, sum tey ikki gera meira og nevnir tað at koyra pizza út.
Tað hevur verið eitt ynski hjá landsstýrismanninum, at Posta ikki ger slíkt.
Landsstýrismaðurin segði soleiðis við Sosialin:
– Felagið hevur tørv á at fara aftur til kjarnutænastuna, sum er teirra høvuðsuppgáva. Har er eitt samskifti millum meg og nevndina um, hvussu tað skal fara fram.
Hann sigur, at tey næstu tíðina fara at leggja eina strategi fyri virksemi hjá Posta. Nýggjur nevndarformaður hjá Posta er Árni Ellefsen, fyrrverandi bankastjóri og grannskoðari, og tað er hann, ið skal taka sær av hesum.
– Eg vil eisini siga, at tað er nokso keðiligt, at landið ikki hevur ein eigarapolitikk. Tað haldi eg, man skuldi havt, sum setti nakrar vegleiðandi reglur fyri tey almennu partafeløgini. Sjálvandi vælvitandi um, at tey eru øgiliga ymisk í mun til uppgávur og hvussu kompleks tey eru, men at tú hevur nakrar meginreglur um, at landið rekur virksemi, sum er samfelagskritiskt, men skal ikki út at kappast við tað privata.
– Tað haldi eg, at ein eigarapolitikkur átti at víst, tað hava vit eisini skrivað í samgonguskjalið, sigur Bjarni Kárason Petersen.
Í samgonguskjalinum stendur soleiðis um eigarapolitikk:
»Eigarapolitikkur fyri almennar fyritøkur, grunnar o.a. skal samtykkjast. Politikkurin skal lýsa, um ávísar almennar fyritøkur, hvørs uppgávur eru vinnuligar heldur enn almennar, kunnu verða einskildar.«
Bjarni Kárason Petersen leggur dent á, at hann kennir einki til júst hesa útbjóðingina, sum Posta hevur vunnið í kapping við tvær privatar fyritøkur.
– Men generelt haldi eg, at feløgini skulu sum meginregla halda seg frá at vera kappingaravlagandi. Men hinvegin er talan um eitt partafelag, sum virkar eftir roknskparlógini og partafelagslógini.
– Tað er meira tað, at vit politiskt ikki hava ásett ein politikk fyri, hvussu landspartafeløgini skulu rekast, sigur hann.
– Kjarnuirksemið hjá Posta eru brøv og pakkar. Bløðini eru í minking, reklamur í minking, stovnar og bankar fara út á vangan, vísir landsstýrismaðurin á.
Posta rekur eisini farmavirksemi, er tað í lagi?
– Tað er eisini fyri at fáa ein part av kakuni – og tá kunnu kappingarneytar hava illgruna um, at tað er kappingaravlagandi.
– Er tað í ordan, at Posta kappast við farmafeløgini.
– Eg haldi sum meginregla, at man skal ikki leggja seg í beinleiðis kapping við privatu feløgini. Trupulleikin er hinvegin, at tað er fortreyt fyri at Posta melur runt, vísir hann á.
Við spyrja landsstýrismannin, um Posta so skal lagast til sítt kjarnuvirksemi.
– Nevndin hevur fingið boð frá mær um at finna út av at tillaga seg til nýggja veruleikan, at brøv og pakkar eru á veg út, hvussu loftar man tí, soleiðis at tað ikki verður belastningur hjá skattgjaldaraum og ikki í beinleiðis kapping við privatu aktørarnar, sigur landsstýrismaðurin.
Seinast hendan samgongan sat, var ætlanin at privatisera Posta. Tann ætlanin var tá slept. Men er tað ein møguleiki í dag?
Tað heldur landsstýrismaðurin ikki.
– Tað er ikki aktuelt. Tað var tað tá. Men tann case'in er ikki so góð nú. Tað hevði helst verið betri at selt tá, tí útgangsstøðið er bara versnað síðani, heldur hann.
– Nú sita vit við onkrum, sum vit mugu rætta upp uppá. Og tað hava vit sett nýggjan nevndanformann – sum dugir slíkt, at taka sær av, sigur Bjarni Kárason Petersen.
