Fyri á leið einum mánaði síðani tók Kristina Clementsen, eykavald á listanum hjá Tjóðveldi, sæti á tingi. Frammanfyri hana á listanum er Petur Háberg, men hann bar seg undan. Petur Háberg greiddi tá frá á Facebook, at hann ikki kendi seg føran fyri at taka avgerðir um stóru málini, so sum fiskivinnunýskipan, pensjónsnýskipan og stjórnarskipan, sum kundu væntast at koma til viðgerðar hesa tíðina. Nú hevur eykavalda umboðið fyri Tjóðveldi aftur úttala seg um avgerð sína á Facebook.
—Og fram um at vera politikkari, so var tað nógv meiri umráðandi fyri meg at vera eitt gott menniskja. At vera góður við fólk rundan um meg. At gera ein mun og vera væl dámdur. Eg skuldi vísa verðini, at man kundi vera the nice guy og samstundis politikkari. Dugi væl at síggja paradoksið í hesum. Tímdi bara ordiliga væl, at tey tingini riggaða saman, sigur Petur Háberg, og greiðir frá, at hóast góðu samsýningina á 30.000 krónur bar hann seg undan til ein fyribilsløgtingssess, og ta avgerðina hevur hann fingið nógvan kritikk fyri.
—Men tað er alt nakað fis, havi eg funnið út av. At stýra okkara framtíðar samfelagi, okkara børnum, okkara innovatión, okkara búskapi, okkara framtíðar Føroyum, er nakað, sum krevur fulla tíð og orku – og meiri enn tað. Sjálvandi er tað eitt fulltíðararbeiði at taka sær av hesum tingunum. Og øll hesi tingini hevði eg ordiliga fegin viljað tikið støðu til og myndað, men eg kom ikki inn. Fair game, sigur Petur Háberg.
— At sita í løgtinginum er mest umráðandi postur í okkara samfelag, tí allur okkara veruleiki verður stýrdur av tí. Og tí fáa fólk eisini góðar pengar fyri at vera har. Og tí kann man sjálvandi ikki koma inn frá høgru og taka stórar avgerðir um t.d. fiskivinnunýskipan, pensjónsnýskipan og stjórnarnýskipan. Sigur seg sjálvt, í mínum heimi. Sjálvandi eru tað tey fólkini, ið hava arbeitt í áravís við málunum, ið skulu taka avgerðirnar – ikki eg, sigur Petur Háberg á Facebook.
