Tað heldur í øllum førum Sjúrður Skaale, hin fólkatingsmaðurin hjá okkum. Hann hevur fleiri ferðir víst á, at eftir hansara tykki er einki høpi í tí, sum Per Højgaard skrivar fyri Edmund Joensen.
Á Facebook fyrr í vikuni skrivar Sjúrður Skaale soleiðis:
»Eg tími ikki longur at kjakast við Edmund og hansara PR-mann – men for the record: Eg kann vátta, at Edmund Joensen ALDRIN hevur verið til staðar, tá hetta mál er viðgjørt í donskum nevndum. EINKI skjal frá Edmundi er at finna um hetta mál hjá nakrari nevnd. Edmund hevur heldur ikki verið í samband við »síni fólk« í Europaparlamentinum.
Og hann hevur ONGA ávirkan havt á tað eftir mínum tykki nøktandi støðutakanina hjá donsku stjórnini.
Edmund (ella kanska serliga PR-maðurin) hava bara sent út tíðindaskriv. Tey hava verið ósonn, sjálvmótsigandi og hava bara havt eitt endamál – og tað er partapolitikkur.
Eg havi sagt tað fyrr og sigi tað aftur: PR-maðurin førir Edmund í óføri!«
Edmund Joensen skjýtur tó aftur eftir Sjúrði Skaale á Facebook:
– Sjúrður Skaale er formalistiskur. Hongir seg í referat frá nevndarfundum. Hann vil flyta pappír úr einum bunka í annan. Tað er als ikki har, ið politikkur á Christiansborg verður rikin. Málini verða í stóran mun avgjørd við tingingum tvørtur um floksmørk, áðrenn tey koma fyri í nevndum. Tað er í tingingum, man fær ávirkan.
So er tað hetta afturvendandi prátið um PR-menn, ið SS sum fyrrverandi spinndoktari hjá Høgna Hoydal og Anfinni Kallsberg framvegis er so upptikin av.
Eri spentur uppá, um SS fer at greiða frá, at hann hevur ein fyrrverandi kringvarpsmann, ið eisini hevur skrivað fyri Sosialin, á lønarlista sínum niðri á Christiansborg.
Tað er ein veruleiki, at SS hevur fleiri fólk at hjálpa sær við skriving og persónligari profilering. Men, sum orðatakið sigur: Man eigur at vera varin at kasta við gróti, tá man sjálvur býr í glashúsi.
