Føroyski landsliðsmálverjin, Pauli Jacobsen bjargaði einum brotskasti av trimum møguligum, og bjargaði í opnum spæli tveimum av 17 málroyndum, tá hann og liðfelagarnir í Cherbourg taptu fyrsta dystin í næstbestu fronsku hondbóltsdeildini hetta kappingarárið.
Cherbourg tapti á útivølli greitt 25-31 fyri Pontault. Í steðginum var Pontault á odda 18-13.
Kappingarneytin hjá Paula í málinum hjá Cherbourg, Ivah Gauthier bjargaði tríggjar av 17 málroyndum í opnum spæli, men bjargaði ongum brotskasti.
Liðfelagarnir hjá Paula skoraðu uppá fýra av fýra brotskøstum, men í opnum spæli skoraðu teir bara uppá 21 av 37 málroyndum.
Komandi fríggjakvøld spælir Cherbourg á heimavølli móti Valence. 16 lið eru í deildini, og tí skulu samanlagt 30 dystir leikast í deildini.
