Parasport Føroyar hava framleitt ein film, sum vísir sersambandið úr einum nýggjum sjónarhorni. Parasport Føroyar er sersambandið fyri ítróttarfólk ið bera brek. Fyrr æt sersambandið ÍSB. Navnabroytingin umboðar eina nútímansgerð av sersambandinum. Parasport er framvegis sosialt og viðurkennandi, og hetta sæst eisini aftur í slagorðinum – øll kunnu íðka. Og endamálið við filminum er at vísa á Parasport úr einum nýggjum sjónarhorni: Tað ítróttarliga, tað kappingarliga, skrivar Parasport Føroyar í tíðindaskrivi í dag.
Ítróttur fyrst og fremst
- Vit ynskja at fáa nýggjar limir. Við filminum varpa vit ljós á tann ítróttarliga partin. Tað snýr seg um ítrótt, og vit vilja, at øll kunnu kenna seg heima í ítróttinum. Filmurin skal samstundis varpa ljós á, at hóast sera ymiskar avbjóðingar, so ber væl til hjá øllum at íðka onkran ítrótt”, sigur Tróndur Ravnsfjall, ítróttarráðgevi í Parasport.
Filmurin sæst við at trýsta HER
Filmurin vísir íðkarar úr trimum ymiskum ítróttargreinum. Ein teirra er badmintonleikarin Eydna Mouritsen, ið situr í rullistóli. Og Eyð Patursson ið hevur Downs-syndrom, men tað forðar henni ikki at gera tað, henni dámar allarbest – at svimja.
Og so eisini Hávard Vatnhamar, ið misti hálvan armin á yngri árum. Nú venur hann triatlon. „Málið er at koma til paralympisku leikirnar og vinna eina medalju fyri Føroyar” sigur Hávard og leggur afturat, at „tað er ikki ein spurningur um, hvat tú kanst – men hvat tú vilt!”
Filmurin er at síggja á heimasíðu teirra: parasport.fo
