Klokkan 20 fer portugisiski dómarin at bríksla fyri fyrstu ferð í Lille, har KÍ fer at spæla sætta og síðsta dystin í Europa Conference League bólkaspælið í hesum umfari.
KÍ er ikki í bestu útgávu í kvøld. Eitt er, at tað nú eru nógvar vikur síðani, at kappingardystir vóru á skrá í hvørjari viku. Eitt annað er, at onkrir av teimum, sum hava verið lyklaspælarar, ikki eru heilt væl fyri.
Páll A. Klettskarð hevur verið skaðadarvaður, og eftir venjingar á grasinum í Lille er tað staðfest, at Páll er ikki nóg væl fyri at vera millum teir fyrstu ellivu. Hann er á beinkinum eitt nú saman við Deni Pavlovic.
Luc Kassi og Mads Bo Mikkelsen eru als ikki á listanum í kvøld. Nils Jonatan Johansson verjir málið, sum hann higartil hevur gjørt í øllum dystunum í Europa í ár. Eykamálverji er Hannis Matras.
Hósdagin 5. oktober endaði tað málleyst, tá ið Lille var gestur hjá KÍ á Tórsvølli.
Lille – KÍ kl. 20.00
Dómarakvartett úr Portugal: António Nobre, Paulo Brás, Pedro Martins og Helder Filipe (4. dómari)
KÍ: Nils Jonatan Johansson – Jóannes Kalsø Danielsen, Odmar Færø, Heini Vatnsdal, Vegard Forren, Patrick da Silva – Árni Frederiksberg, René Shaki Joensen, Jákup B. Andreasen, Claes Philip Kronberg – Sivert Gussiås
Á beinkinum: Hannis Matras, Deni Pavlovic, Páll A. Klettskarð, Símun Kalsø, Dávid B. Andreasen, Børge Petersen, Silas Gaard, Latif Ahmed, Jákup N. Vilhelmsen, Jóhan Josephsen
