Páll Guðlaugsson, sum seinastu tvey árini hevur vant GÍ, fer nú til Íslands at royna seg sum venjari. Hann hevur gjørt tveyára sáttmála við Leiftur, sum spælur í úrvalsdeildini, tað vil siga bestu deildini, í Íslandi.
Páll Guðlaugsson stóð á odda fyri føroyska A-landsliðnum í fótbólti, tá vit tóku fyrstu fetini millum europeisku risarnar. Hann var venjari, tá bragdið í Landskrona varð framt, og seinastu tvey árini hevur hann vunnið tríggjar av fýra kappingum, sum hava verið at kappast um í Føroyum. Í fjør vunnu hann og GÍ bæði landskappingina og steypakappingina, og í ár vunnu teir steypakappingina, og endaðu sum nummar trý í landskappingini.
Páll Guðlaugsson er spentur til nýggju avbjóðingina í Íslandi, og hóast hann er úr Íslandi, er skifti til Leiftur ikki endaligt farvæl við Føroyar, sigur hann.
