Arabiska Samgongan fer ikki at seta seg upp ímóti tí, um palestinar gera av at taka friðarsamráðingarnar við ísraelsmenn uppaftur. Tað sigur Hamad bin Jassem, sum er forsætis- og uttanríkisráðharri í Qatar.
Enn er kortini lítið, sum bendir á, at tann palestinska leiðslan hevur nakran hug til at seta við samráðingarborðið saman við ísraelsmonnum.
Tvørturímóti segði ein palestinskur talsmaður í dag, at Mahmoud Abbas, forseti, fer at kunna Arabisku Samgonguna um, at neyðugt er við fleiri framstigum, áðrenn samráðingarnar kunnu takast uppaftur.
Stjórnin í Ísrael sigur, at palestinski forsetin hevur sett alt ov stór krøv fyri at fara aftur til samráðingarborðið.
Friðarsamráðingarnar millum ísraelskar og palestinskar myndugleikar steðgaðu, tá ísraelski herurin fór inn í Gaza-geiran í 2008.
