Aftaná at hava mist trý stig undanfarnu tveir dystirnar komu Pætur Mikkjalsson og liðfelagarnir í AMO aftur á sigursslóðina í næstbestu svensku hondbóltsdeildini.
AMO vann á heimavølli 27-21 á Västerås. Í steðginum var AMO á odda 13-8.
Pætur var aftur ein klettur í verjuni í kvøld, og tað eydnaðist honum eisini at skora tvey mál í kvøld.
Pætur heldur fyri í stuttari viðmerking, at teir í AMO altíð byrja illa í hvørjum hálvleiki. Hann fegnast um sigurin, men heldur, at spælið kundi verið betri hjá AMO.
Samstundis sum AMO vann tapti argasti kappingarneytin í uppflytingarstríðnum, Karlskrona 27-28 (13-11) móti Vinslöv á útivølli.
AMO er oddalið í deildini við 34 stigum. Karlskrona hevur 32 stig á øðrum plássinum, men teir hava spælt ein dyst meira enn AMO.
Sunnudagin tekur AMO móti Vinslöv á heimavølli.
