Eins og undanfarin ár skipar FRÍKIRKJAN OASAN fyri stórari páskastevnu. Sum tað sæst av skránni á síðu 2, verða - umframt okkara egnu leikfólk - gestatalararnir Stephan og Anne Christiansen úr Noregi.
Tey koma at tala á kvøldmøtunum skírishósdag, langa fríggjadag, páskaaftan og páskadag kl. 19, umframt eisini á ungdómstiltakinum kl. 2230 langafríggjadag. Hetta er aðru ferð, tey koma til Føroya í samband við páskastevnu. Tey vóru høvuðstalarar í Kelduni á páskastevnuni í 2007.
Stephan Christiansen er norskur kristniboðari. Hann er 39 ára gamal og vaksin upp í Tønsberg og Horten og er giftur við Anne Christiansen. Frá ungum árum av hevði hann eina visión um at boða evangeliið til ungdómin.
Og avleiðingin av hesum bleiv so stovnanin av næminga- og studentafelagsskapinum Ny Generasjon, sum í 1993 byrjaði sum eitt bønar- og evangeliseringsarbeiði millum studentar á universitetinum í Oslo. Hetta tiltakið er eitt tvørkristiligt næminga – og studentaarbeiði, ið hevur til endamáls, at næmingar og studentar skulu boða evangeliið á øllum skúlum og læriplássum í Noregi. I 1998 bleiv Ny Generasjon stovnað i Danmark, og i 1999 í Íslandi, og er nú annars í mongum øðrum londum. Hjúnini bæði hava eisini verið við til at stovna felagsskapin Jesus Revolution, ið er ein kristin ungdómsrørsla, sum byrjaði í Noregi í 1997, og hevur sum endamál at boða evangeliið um Jesus til europeiska ungdómin.
Anne Christiansen byrjaði JesusKvinnur í 2003 undir eini stevnu í Oslo. Saman við manni sínum er hon leiðari í JesusChurch í Oslo, og reka tey eisini trúboðaraarbeiðið “JesusRevolution”, eins og tey eisini stovnaðu næminga- og studentafelagsskapin “Ny Generasjon”.
Málið við JesusKvinnum, sambært Anne, er at kvinnur úr ymsum trúarrørslum skulu standa saman til tess at byggja Guds ríki og styrkja tey kristnu virðini í landinum. Tá ið vit standa saman, hava vit positiva ávirkan. Vit halda, at tað er sera umráðandi at eggja kvinnum at brúka heim síni sum eitt vælegnað bønarstað, og eisini lata heim síni upp sum eina oasu hjá grannum og vinum, sigur hon.
JesusKvinnur hava nú stevnur kring alt Noreg fyri at eggja kvinnum til at tæna, har tær eru í dagligdegnum. Arbeiðið miðar eftir at savna ættarliðini, og er hesin felagsskapur tvørkirkjuligur. Á tann hátt er møguligt at fáa íblástur hvør frá øðrum og standa saman í týdningarmiklum tíðum.
Jesus hevur leiðir, nýmótans kvinnur kunnu ganga, so vit ikki missa tað, ið undanfarin ættarlið hava bygt upp.
Á heysti 2005 vitjaði Anne Christiansen í Føroyum, tá hon skipaði fyri einari JesusKvinnustevnu í Oasuni.
Vælkomin í Oasuna
