Enn eina ferð var tað sera tætt og spennandi. Enn eina ferð vóru fleiri bátar við í kappingini um fremsta plássið, og enn eina ferð vóru tað klaksvíkingar, sum struku avstað við sigrinum.
Klaksvíkingar og miðvingar vóru í fantastiskari kapping um fremsta plássið, og Suðuroyarbátarnir, Tvørabáturin og Smyril, vóru í sera tættari kapping um triðja plássið. Riddarin úr Miðvági royndi fleiri ferðir at bjóða av, og onkra ferðina var hann fremstur, men Páll Fangi svaraði aftur, og á málinum var hann skutin frammanfyri Riddaran.
Tað var ikki eiti avrik, sum bestu bátarnir vístu hesa ferð. Tíðin hjá Páll Fanga var tann besta, sum nakað 6-mannafar við monnum nakrantíð hevur vunnið á Eystanstevnu við. Vinnaratíðin leygardagin var á teimum 1500 metrunum 7.17.24. Besta tíðin frammanundan var tann hjá Hvessingi í 1988. Ta ferðina róðu teir í Hvalvík og Streymnesi teir 1500 metrarnar í tíðini 7.18.30 ella 0.00.34 lakari enn Páll Fangi.
Tað vil siga, at tíðin hjá Riddaranum hesa ferð var eitt vet betri enn besta tíðin frammanundan leygardegnum.
Tvørabáturin, Smyril og Strálan fylgdu væl við á fyrsta partinum av teininum. Strálan var tann fyrsti, sum misti. Tvørabáturin og Smyril duttu eina bátslongd afturum teir báðar fremstu. Men frástøðan fram í oddin var ikki størri enn so, enn at tað er møguleiki fyri at taka tað innaftur hjá Smyrli og Tvørabátinum, tá ið tað næsta leygardag verður kappróður í Vági.
1 Páll Fangi 07:17.24
2 Riddarin 07:18.22
3 Tvørabáturin 07:23.11
4 Smyril 07:23.18
5 Strálan 07:26.22
6 Skúgvur 07:33.15
7 Hósvíkingur 07:41.12
8 Jarnbardur 07:49.08
9 Lómur 07:55.19
10 Sølmundur 08:06.11
Støðan
1 Páll Fangi 21
2 Tvørabáturin 16
3 Riddarin 15
4 Smyril 14
5 Strálan 8
6 Skúgvur 7
7 Hósvíkingur 2
8 Lómur 1
