Størsta altjóða avbjóðingin nakrantíð hjá føroyskum ítróttarfólki verður í hesum árinum, tá ið Pál Joensen skal luttaka í olympisku svimjikappingini, sum verður í London um mánaðarskiftið juli/august
Føroyska heimsstjørnan skal luttaka í 1500 metra kappingini í frísvimjing. Formaðurin í Svimjisambandinum, Jon Hestoy, hevur fleiri ferðir sagt, og hann endurtók tað í ítróttarsendingini í sjónvarpinum fyri nýggjár, at tað hevði verið satt bragd, um tað eydnaðist hjá Pál at kvalifisera seg til sjálva finaluna.
Nú er tað greitt, at tað verður kappast í innleiðandi riðlunum í 1500 metra kappingini í frísvimjing fyrrapartin fríggjadagin 3. august. Heimasíðan hjá Svimjisambandinum veit at siga, at teir fyrstu kava í hylin klokkan 10.27, og at innleiðandi umfarið verður liðugt á middegi henda sama dagin ella heilt neyvt klokkan 12.01.
Finalan í 1500 metra kappingini verður leygarkvøldið 4. august, sum er síðsta kvøldið í OL svimjingini. Klokkan 19.36 fara bestu svimjararnir á 1500 metra teininum at taka støðu, og so er stóri spurningurin, um tað tá fer at standa ein føroyingur millum úrmælingarnar!
