Barnagarðurin í Nólsoy er nú eitt ára gamal, og umboð frá kommununi hava verið og kannað bygningin í sambandi við eitt ára garantiið. Millum annað skulu fleiri lekar finnast Nú eitt-ára garantiið er um at renna út, hevur Tórshavnar kommuna saman við byggiharra gjøgnumgingið barnagarðin í Nólsoy.
Onkrir manglar eru, og hesir skulu rættsat nú, tá garantiið kortini skal fremjast.
Tað hava verið trupulleikar við leka í barnagarðinum, og tað tykist, sum stava hesir frá listunum rundan um vindeyguni, eins og tað lekur nakað millum hurðarnar.
- Hetta kann eisini stava frá, at vit ikki hava nýtt hurðarnar rætt, tí neyðugt er at lyfta hondtakið upp, fyri at hurðin skal fara ordiliga í lás, sigur Guðrun Hansen, leiðari.
Heðin Mortensen, borgarstjóri, sigur, at alt skal fáast í rættlag, nú tað fer at vára.
- Spæliplássið skal gerast liðugt, og sjálvandi skulu lógarásett krøv lúkast so sum brandtrappa. Slíkt skal bara vera í lagi, sigur Heðin Mortensen.
Barnagarðurin er harðliga tiltrongdur. Hann er nomineraður til 42 børn býtt á vøggustovu, barnagarð og frítíðarskúla. Frá 1. apríl verður barnatalið 9 í vøggustovu, 17 í barnagarði og 10 í frítíðarskúla.
