Onga aðrastaðni í heiminum, hevur so nógvur peningur verið brúktur uppá at keypt leikarar í summar sum í Onglandi.
Sambært FIFA, hava tey ensku feløgini heinta nýggjar leikarar frá útlondum fyri gott og væl 6,7 milliardir krónur.
Hetta er nærum tvífalt so nógv sum nummar tvey á listanum, Spania. Tey sponsku feløgini hava í summar keypt inn fyri áleið 3,3 milliardir krónur.
Hini londini sum hava brúkt nógvar pengar uppá at keypa leikarar í summar eru Italia (2,6 milliardir krónur), Frakland, (1,8 milliard krónur) og Týskland (1,7 milliard krónur).
Í Italia og Fraklandi er upphæddin í ár munandi hægri enn hvat hon var seinasta ár.
Uppgerðin sum FIFA hevur gjørt, er einans galdandi fyri leikarar, sum tey ensku feløgini hava keypt frá útlendskum feløgum. Skal man rokna teir handlarnar sum eru farnir fram innanríkis í Onglandi, kemur upphæddin fyri keyptar leikarar uppá 8,7 milliardir krónur, har serliga handilin av Raheem Sterling frá Liverpool til Manchester City skrúvar prísin nógv upp.
Tey ensku feløgini hava í summar selt leikarar fyri 2,5 milliardir krónur til útlendsk feløg í summar.
