Seinastu árini hevur Grundin verið ein av væl umtóktu pallunum á G!, har serliga tann yngri skarin av gestum hevur vitjað fyri at dansa við til elektroniskan tónleik.
Í ár er tó avgjørt at strika Grundina sum pall. Tað er tó eingin orsøk at falla í fátt hjá teimum, ið dáma elektroniskan tónleik, tí orsøkin til broytingina er, at tónleika sjangran er vorðin ov stór til lítla pallin.
- Orsøkin til, at Grundin er niðurløgd er tí, at sjangran er størri enn nakrantíð áður. Tey nøvnini vit hava fingið til festivalin eru ov stór til Grundina, og tí eru tey flutt á stóra pallin á sandinum. Her er talan um veruliga heimskend nøvn innan teirra sjangru, sigur Sigvør Laksá, stjóri á G!
At satsa upp á elektroniskan tónleik er eisini nakað, ið passar væl inn í andan hjá G!
- Tá G! varð stovnað, var tað fyri at gerast ein umráðandi pallur hjá føroyskum tónleiki út í heim, men endamálið var eisini at bjóða føroyingum nýggjan, øðrvísi, provokerandi tónleik, ið ikki er at hoyra í útvarpinum, greiðir Sigvør Laksá frá.
Tað er tó eisini ein praktisk orsøk til, at man hevur valt at strika Grundina sum pall.
- Vit selja umleið 3.500 atgongumerkir, og tá G! byrjaði vóru tað tríggir pallar. Tað varð seinni hækkað til fýra pallar, men tá vit ikki selja so nógv atgongumerkir, so fara vit at royna at samla fólkini meira. Men tað kann væl vera, at tá vit eftirmeta festivalin ásanna, at tað var skeivt at strika Grundina, og seta hana á skrá aftur næsta ár, sigur Sigvør Laksá.
