Grønlendska landsstýrið hevur ikki í hyggju at seta ein fastan arbeiðsbólk, ið skal ráðgeva landstingspolitikarunum í spurningum um framtíðar støðuna hjá Grønlandi sum ráevnisútvinnandi tjóð.
Tað var svarið, sum IA-tingkvinnan, Maliina Abelsen (myndin), hevur fingið frá landsstýrismanninum í ráevnismálum, Jens-Erik Kirkegaard, eftir at hon hevur sett honum skrivligar fyrispurningar um hetta og onnur líknandi viðurskifti í landstinginum.
Talan var um eina røð av fyrispurningum, ið allir snúðu seg um ráevnini í grønlendsku undirgrundini, og serliga vildi hon vita, hvussu verður við ráðgevandi arbeiðsbólkinum og hvussu Grønland kann fáa sum mest búskaparliga burtur úr landsins undirgrund.
Landsstýrið ætlar ikki at seta ein fastan arbeiðsbólk, men fer so hvørt at venda sær til ymsar serfrøðingar, alt eftir hvørji mál eru á skránni, stendur í svarinum frá landsstýrismanninum.
