Eitt nýtt lítið katalog, ið ber heitið On Stage Føroyar, verður komandi vikurnar sent til flest virkir og stovnar í Føroyum. Eisini verður tað sent til føroysku feløgini í Danmark og aðrastaðnis, har onkrum tørvar gott føroyskt undirhald.
Í heftinum finst eitt yvirlit yvir føroyskar tónleikarar, ið bjóða seg fram um so er, at eitt virki ella onnur hava ætlanir um at skipa fyri eini veitslu, konsert, jóladøgurða, stevnu ella øðrum tiltaki.
Innihaldið er skipað í ymsar bólkar, har ein kann velja ímillum hvat slag av undirhaldi ein hevur tørv á, og eru bólkarnir hesir: Solo, Duo, Country, Gospel, Stand Up, in Concert og veitslubólkar.
Hetta vil við øðrum orðum siga, at vantar onkrum undirhald, ber til at seta seg í samband við On Stage Føroyar, so syrgir felagið fyri restini. Eisini ber til at seta seg beinleiðis í samband við undirhaldaran.
On Stage Føroyar hevur eisini eina heimasíðu (www.onstagefo.com) ? og verður tað hon, sum í framtíðini fer at mynda bookingfelagið On Stage Føroyar. Katalogið fer í søguna, og heimasíðan verður andlitið hjá felagnum í framtíðini. Hon verður uppdaterað frá degi til dags við tíðindum um lívið hjá teimum, ið eru við á hesi síðuni, um fløguútgávur við meira.
Umframt at hjálpa føroyskum listarfólki, ið eru limir í felagsskapinum On Stage Føroyar við spæliarbeiði, er eitt av aðalmálum felagsins at veita føroyskum tónleikarum og undirhaldarum møguleikan at undirhalda í Danmark. Tað verði seg í føroysku feløgunum ella t.d. í einum av mongu countryklubbunum, sum finnast ymsa staðni í stóra landinum.
Tað er miðlavirkið media 2000, sum gevur katalogið út, og er ánari av heimasíðuni www.onstagefo.com.
