Tað er bert í fáum førum, at tað kann staðfestast, hvar fólk eru jarðað í gamla kirkjugarði, um tað ikki er ein gravsteinur við lesandi innskrift á steininum. Men í summum førum veit ættin, hvar viðkomandi er grivin, og tað er galdandi fyri henda partin.
Her er talan um Christian Johan Marius Christiansen. Hann var føddur 7.3.1861 og doyptur 26.4. sama ár í Havnar kirkju.
Christian var føddur uttan fyri hjúnalag, og mamman doyði, tá hann var 19 ára gamal.
Sum navnið ber boð um, so hevur Ommu Kissa verið nógv hjá ommu síni í móðurætt, men í 1880 er hann 18 ára gamal í Tranti hjá abbanum í faðirætt.
Eitt skifti býr hann hjá pápanum í Tranti úti á Reyni. Pápi Kissa, Dánial Jákup Danielsen, hevur havt sera góð bóklig evnir. Longu 13 ára gamal hjálpir hann til á skrivstovuni hjá sorinskrivaranum, og tá ið hann verður konfirmeraður í Havnar kirkju, stendur hann fremstur og fær ug í “kundskab” og ug í “opførsel”. Tað, at ein drongur tá í tíðini arbeiðir seg frá ongum og til at gerast sýslumaður, talar fyri seg.
Kissa var timburmaður og hevði verkstað, nevnt Ceres, saman við synunum Viggo og Haldor í Ísaksstovu í Gongini, beint norðanfyri gamla Sjóvinnubankan, har Trygd er nú.
Ommu Kissa og synirnir Petur og Haldor doyðu allir av tuberklum í 1923 og 1924.
Petur, ið nýliga var giftur við Vestinu, er grivin í ovara høgra horni í gamla kirkjugarði, meðan hinir báðir eru grivnir oman móti portrinum.
Kona Kissa, Johanna Maria, (1866-1948), er grivin undir liðuni av manninum og soninum Haldor.
Ommu Kissa búði undir Ryggi ella í Kilarkanalini sum tað eisini verður nevnt. Jógvan Sofus Vágsheyg eigur húsini í dag.
Tá Ommu Kissa og yngsti sonurin Haldor doyðu í 1924, flutti einkjan Johanna Maria Augustina í húsini beint niðanfyri vegin.
Hetta er Legathúsið ella hjá Dreygaranum, Wencelaus Marius Debes, sum fyrr er umrøddur í hesi røð.
Hann og systirin Johanna Henrietta, sum eisini var ógift, búðu í hesum húsum. Johanna Maria var nógv um hesi bæði tá tey eldust.
Johanna Henrietta doyði í 1902, 82 ára gomul. Dreygarin doyði í 1914, 88 ára gamal.
Johanna Maria var dóttir Koppa Jákup í fyrru giftu. Jákup gerst einkjumaður í januar 1873, og 26. apríl 1874 giftist hann uppaftur við Siggu Fredrikku Danielsen, systir sýslumannin. Sigga Fredrikka átti, áðrenn hon giftist, Dollan, kendur frá sínum virksemi í Congo. Kissa og Dollin vóru tískil systkinabørn. Dollin er fyrr umrøddur í hesi røð.
Lesiklubburin
Í sínum áhugaverdu endurminningum hevur Kristian Djurhuus eina stuttliga søgu um lesiklubbin hjá mammu síni, har Maria, kona Ommu Kissa, eisini var við. Hann greiðir soleiðis frá:
Kona Ommu Kissa, Maria, var vinkona mammu mína. Maria plagdi vanliga at lesa upp, tá mamma hevði bindiklubb eina ferð um vikuna. Maria var ein sera intelligent kvinna. Hon hevði sum ung tænt hjá postmeistara Danielsen, sum var beiggi sýslumannin Danielsen.
Klubburin var mikudagar. Tær komu saman í køkinum hjá okkum aftaná nátturða og pápi vanliga var farin til songar.
Tað varð altíð lisið upp úr vikublaðnum »Hus og Hjem«, sum tær hildu í felag. Í blaðnum vóru røðir við skaldsøgum um kærleika og brotsverk. Mamma fjasaðist í køkinum, meðan Elsebeth Helena, mostir, bert sat og lurtaði. Eg haldi ikki, at tær nakrantíð høvdu nakað handarbeiði við. Tær livdu rættuliga við í skaldsøguni, sum var á skránni. Tað tyktist sum tær trúðu fult og heilt, at hetta vóru sannar søgur.
Eg minnist eina ferð, eg fór framvið køkinum, meðan lisið var upp, hvussu tær gjørdu viðmerkingar so hvørt, sum hendingar fóru fram, sum »nei, sikke eitt beist at bera seg soleiðis at« ella »hatta hevði hatta búrbeistið gott av.« Mamma bjóðaði kaffi og køkur.
Áttu tríggjar borgmeistarar
Ommukissa og Maria áttu fýra synir:
Jákup Baja (1888-1965) var bankastjóri á Tvøroyri. Hann var giftur við Andreu Arge (1891-1969). Tey vóru barnleys.
Viggo (1892-1964) var giftur við Katrinu f. Petersen (1891-1959), sum hevði handilin Katrina Christiansen. Viggo var timburmeistari, men tók við handlinum, tá ið Katrina doyði. Børn teirra vóru Peter C., Maria og Haldor. Petur var býráðslimur í Havn í 20 ár. Av hesum var hann borgmeistari í átta ár. Petur var eisini tingmaður eitt skifti. Sonur hansara Jan hevur verið býráðslimur í 28 ár og borgmeistari í fýra.
Petur (1895-1923) var giftur við Vestinu Joensen (1892-1946). Tey áttu Peter F. Christiansen. Pápin doyði áðrenn sonurin varð føddur. Peter F. var kendur frá Dimmalætting, men hann var eisini politikari. Hann var býráðslimur í 14 ár og borgmeistari í eitt teirra. Umframt tað var hann eisini tingmaður og landsstýrismaður. Tískil kann sigast, at Ommu Kissa og Maria hava átt tríggjar borgmeistarar í Havn!
Haldor doyði í 1924, bert 23 ára gamal.
Kristian Djurhuus helt, at allir fýra synir høvdu sera góðar gávur, men vóru eisini eitt sindur originalir!
Systkin
Ommukissa átti ein hálvbeiggja í móðurætt, sum var 10 ár yngri. Hesin, ið varð nevndur Havna Dánial, fór til Skálavíkar, tá ið mamman doyði. Har giftist hann og búði alt sítt lív.
Ein av hansara eftirkomarum er Linjon Christiansen, skipari og borgarstjóri í Skálavík.
Daniel J. Danielsen, sýslumaðurin, giftist í 1877 í Nes kirkju við Onnu Malenu Weyhe (1857-1894).
Tey fingu hesi børnini, sum blivu hálvsystkin Kissa:
Elsebeth Cathrina (1878-1968). Ógift.
Dánial Danielsen (1880-1887)
Elisa (1881-1953)
Petur Christian (1884-1962)
Elsa (1886-1945). Giftist við Jacob Vilhelm Weihe (1877-1955) á Selatrað.
Dánial (1888-1955). Sigldi uttanlands sum skipari
Gunnar (1890-1969). Giftist við Ingu Jacobsen (1889-1979) í Søldarfirði. Var skipari og tey fluttu til Vágs. Synirnir fingu sær navnið Gunnarsson. Hansara ætt stendur m.a. fyri Skansin offshore, sum ger seg nógv galdandi í oljuvinnuni.
Victor (1894-1961). Giftist við Henrikku Olsen (1896-1997) úr Søldarfirði. Búsettust í Fuglafirði. Kendur sum trúboðari
----
Kelda: Viggo Christiansen
-----
Komandi partur
Í komandi parti verður greitt frá Johannes Thomsen, Funnings Jóannes, og hansara ætt.
